Netöryggiskeppni Íslands, einnig nefnd Tölvuöryggiskeppni íslenskra ungmenna eða einfaldlega Tían, er árlegur viðburður sem haldinn er af frumkvæði samgöngu- og sveitarstjórnarráðuneytisins. Markmið keppninnar er að efla áhuga íslenskra ungmenna á netöryggi og auka þekkingu og færni þeirra sem sýna því áhuga. Þar að auki þjónar keppnin því hlutverki að vera forkeppni Íslands fyrir Netöryggiskeppni Evrópu, European Cyber Security Challenge (ESCS). Markmið ESCS er að vekja áhuga á netöryggi um alla Evrópu Netöryggiskeppni Íslands á því sviði.

Það þarf ekki að liggja lengi yfir fréttamiðlum samtímans til að átta sig á mikilvægi tölvuöryggis í nútímasamfélagi. Reglulega birtast fréttir af fyrirtækjum og einstaklingum verða af háum fjárhæðum vegna netárása og jafnvel tölvuinnbrot framkvæmd af ríkjum með það að markmiði að njósna um önnur ríki.

Þrátt fyrir mikilvægi netöryggis, þá skortir ennþá hæfileikaríkt fólk til að takast á við þær áskoranir sem því fylgja. Af þessari ástæðu setti Netöryggisstofnun Evrópu, ENISA, á laggirnar Netöryggiskeppni Evrópu. Markmið keppninnar er að hvetja ungt fólk til að kynna sér netöryggi og jafnframt hvetja ungt fólk til að íhuga að leggja netöryggi fyrir sig að atvinnu.

Um keppnina

Markmið keppninnar er að velja 10 manna lið til að taka þátt í ESCS 2021 fyrir Íslands hönd. Samvkæmt reglum ESCS verða keppendur að vera á bilinu 14-25 ára (fædd á árunum 1996 til og með 2007). Netöryggiskeppnin fer fram í tveimur hlutum. Tveggja vikna forkeppni fer fram á Netinu í lok janúar og er opin öllum. Þeir keppendur sem standa sig best í forkeppninni, öðlast þáttökurétt í landskeppninni, sem haldin verður í mars. Frammistaða keppenda í landskeppninni verður svo lögð til grundvallar þess að velja 10 manna hóp til að taka þátt í ECSC 2021 sem haldin verður í lok september í Prag, Tékklandi.

Bæði forkeppnin og landskeppnin verða hefðbundnar jeopardy style CTF (capture the flag) keppnir.

En ég hef enga reynslu af netöryggi og CTF, er þessi keppni fyrir mig?

Ef svo er, þá ertu í sömu sporum og flestir aðrir og það er allt í lagi. Það er eins með netöryggi og flest annað, það þarf bara áhuga og þolinmæði til að öðlast færnina. Þannig ef þú ert forvitin(n), þá er gott að byrja hér.

Hvað er að gerast núna?

Forkeppninni er lokið #

Forkeppninni lauk rétt fyrir miðnætt í gær. Við viljum þakka öllum sem tóku þátt.

Núna munum við fara yfir niðurstöður keppninnar og bjóða þeim sem hafa keppnisrétt að taka þátt í landskeppninni.

Niðurstöður keppninnar má finna á https://0xa.is/scoreboard.

Nánar...

Framkvæmd keppninnar

1. feb - 15. feb

Forkeppni

Forkeppnin er haldin á Netinu og er opin öllum!

Forkeppnin verður haldin samhliða UTmessunni og mun Syndis halda stuttar kynningar á CTF keppnum og tengdu efni, sem nýst getur byrjendum sem hafa áhuga á að taka þátt í forkeppninni.

Þeim keppendum sem standa sig best í forkeppninni (og hafa keppnisrétt) verður boðið að taka þátt í landskeppninni.

20. mar - 21. mar

Landskeppni

Keppnin stendur yfir í 2 daga. Framkvæmd og staðsetning keppninnar er háð gildandi sóttvarnarreglum og aðstæðum í þjóðfélaginu.

Þeir keppendur sem standa sig best í landskeppninni verða valdir í keppnishóp.

1. apr - 27. sep

Æfingar keppnishóps

Reglulegar æfingar verða haldnar fyrir keppnishópinn.

28. sep - 2. okt

Netöryggiskeppni Evrópu (ECSC)

Lið frá rúmlega 20 Evrópulöndum etja kappi í Netöryggiskeppni Evrópu, sem haldin verður í Prag, Tékklandi, að þessu sinni.

Þjálfarar velja 10 einstaklinga úr keppnishópnum til að taka þátt fyrir Íslands hönd.